Дафтари матбуоти Додгоҳ рӯзи 19-уми август хабар дод, ки Лутфуллои Назирмад, Ҷумъахон Қурбонов, Ёқубҷон Юсуфзода ва Муҳаммад Шарифзода то 22-юми ноябри имсол дар Боздоштгоҳ мемонанд.

Мурофиа паси дарҳои баста гузашт. Тафсилоташ, аз ҷумла мавқеи гумонзадҳо маълум нест.

Аз ин пеш, рӯзи 16-уми август, Додгоҳи ноҳияи Басманний бо дархости Кумитаи тафтишоти Русия муҳлати ҳабси Муҳаммадсобир Файзов, Далерҷон Мирзоев, Муродалӣ Раҷабализода ва Шамсидини Фаридунро ҳам то 22-юми ноябр дароз кард.

Ин афрод аз моҳи марти имсол дар ҳабс ҳастанд.

Ҳамла ба "Крокус Сити Ҳолл" дар наздикии Маскав дар шаби 22-юми марти имсол сурат гирифт. Мақомоти Русия гуфтанд, дар ин ҳодиса 144 нафар ҷон бохта, беш аз 500 кас осеб диданд.

Гурӯҳи тундрави "Давлати исломӣ" ё ДОИШ масъулияти ҳамларо ба дӯш гирифт, вале баъзе аз мансабдорони Русия ангушти иттиҳомро ба тарафи Украина дароз карданд. Киев даст доштанашро дар ҳодиса инкор кард.

Додгоҳи ноҳияи Басманнийи шаҳри Маскав то кунун беш аз даҳ нафар, аз ҷумла шаҳрвандон ва зодагони Тоҷикистонро ба гумони даст доштан дар ҳамла ба “Крокус Сити” ба ҳабс гирифт. Шиканҷаи ошкори боздоштшудаҳо таҳқиқи мунсифонаи қазияро зери суол бурдааст.

Чанд шаҳрванди боздоштшудаи Тоҷикистон ба зидди қарори додгоҳ шикоят карда, худро расман бегуноҳ донистанд. Додгоҳ дархости онҳоро барои бозбинии парванда напазируфт

Муҳоҷирони тоҷик мегӯянд, пас аз ҳамла санҷишу боздошт ва ихроҷ афзуда, муносибати мардуму корфармоён бо онҳо дар Русия тағйир ёфтааст.

Шаҳрвандони боздоштшудаи Тоҷикистон, ки муҳлати ҳабсашон то моҳи ноябр дароз шуд:

МУҲАММАДСОБИР ФАЙЗОВ

Муҳаммадсобир Файзови 19-соларо рӯзи 23-юми марти имсол дар Русия дастгир карда, бо аробаи маъюбӣ ва либоси тиббӣ ба Додгоҳи ноҳияи Басманний оварданд. Пеш аз он дар шуъбаи эҳё буд ва бозпурсияш дар он ҷо гузашт. Ҳангоми амалиёти боздошт як чашмаш осеб дидааст.

Сайрам Файзова, модари Муҳаммадсобир Файзов, моҳи марти имсол ба Радиои Озодӣ гуфт, ҳеч бовараш намеояд, ки фарзандаш ҳамлаи террористӣ анҷом додааст. "Писарам шахси мазҳабӣ набуд, намозро ҳам соз намехонд, қазо мекард," -- нақл карда буд ӯ.

Дар аксу наворҳояш дар шабакаи иҷтимоии "ВКонтакте"-и русӣ Муҳаммадсобир Файзов гоҳе бо риш ва дар бархе маврид бидуни риш ҷавони шод ва коргари хуб тасвир ёфтааст. Аз миёни аксу наворҳои гузоштаи ӯ саҳнаҳое аз кораш бо муштариҳои рус, маҳалли кор, мошинсаворӣ ва наворҳои кӯтоҳ бо мусиқӣ низ дида мешаванд. Баъзе аз расонаҳои Русия нигоштанд, ки ӯ ба варзиш ҳам рағбат дошт ва дар толори варзишии War Pro дар Иваново дар дарсҳои кикбоксинг ширкат кардааст.

ДАЛЕРҶОН МИРЗОЕВ

Далерҷон Мирзоеви 32-сола аз деҳаи Галахонаи ноҳияи Рӯдакӣ рӯзи 23-юми марти имсол дар Брянск боздошт шуд. Дар наворе дар шабакаҳои иҷтимоӣ, ки иддао мешавад лаҳзаи боздошти Мирзоев аст, ӯро аз болои як дарахт ба поин фароварда, сипас ба дастонаш завлона мезананд.

Ба нақли наздиконаш, ӯ шаш моҳ пеш аз ҳодиса ба Русия рафта, дар хонаи амакбачааш дар Новосибирск мезист ва таксӣ меронд. Дар Тоҷикистон низ ба таксиронӣ машғул будааст.

Модараш, Гулракат Мирзоева, гуфта буд, ки бовар надорад, ӯ дар ҳодисаи террористӣ даст дошта бошад.

САИДАКРАМ РАҶАБАЛИЗОДА

Мақомоти Русия Саидакрам Раҷабализодаро рӯзи 23-юми март дастгир карда, дар аввал барои ду моҳ (то 22-юми май) ба ҳабс гирифта буданд. Ҳамсараш Бибисоро Ашӯрова ба Радиои Озодӣ гуфт, ӯ дар аввали моҳи январи имсол барои кор ба Русия рафт, аммо "тақрибан се моҳ на занг зад, на суроғ кард ва на пул фиристод".

Манобеи амниятии Туркия ба нашрияи “Ҳуррият”-и ин кишвар гуфта буданд, ки Саидакрам Раҷабализода 5-уми январи имсол вориди Истанбул шуда, 2-юми март якҷо бо Фаридуни Шамсиддин, гумонбари дигари ҳамла ба "Крокус", ба Русия рафт.

Саидакрам Раҷабализода то замони ба Русия рафтан дар корхонаи мебелсозӣ дар шаҳри Ваҳдат кор мекард. Ҳамсараш мегӯяд, "ӯ кӯшиш дошт як мошини “Опел” харида, дар ҳамин ҷо монад ва ба кораш идома диҳад.”

Ҳамдеҳагон ва ҳам наздиконаш гуфтанд, Раҷабализода намоз мехонд, аммо дар ягон ҷо таълими динӣ нагирифта буд. Бибисоро Ашӯрова мегӯяд, “мактаби миёнаро то синфи 9-ум хондааст. Дигар дар ягонҷо таҳсил накарда набуд. Гоҳ намоз мехонд, гоҳ намехонд.”

ФАРИДУНИ ШАМСИДДИН

Мақомоти Русия мегӯянд, номи Фаридуни Шамсиддини 25-сола дар "рӯйхати террористон ва ифротгароён" дар ин кишвар сабт шудааст. Аз шаҳри Ҳисор аст. Рӯзи 23-юми март дастгир карданд.

Дар навори бозпурсии мақомоти Русия Фаридуни Шамсиддин дар ҳоле ки дастонаш баста ва дар замин ба зону зада буд, гуфт, барои иҷрои ҳамлаи террористӣ аз ёвари як рӯҳонӣ “500 ҳазор рубл” гирифт. Баъзе аз корбарони шабакаҳои иҷтимоӣ ва коршиносон ба дурустии он шубҳа карданд.

Шабакаҳои русӣ дар Телеграм рӯзи 23-юми март акси шиканҷа шудани ӯро бо барқ нашр карданд. Бахши русии Радиои Озодӣ дар як таҳқиқот бо такя ба саҳифаҳои Фаридуни Шамсиддин дар шабакаҳои маҷозӣ маълум кардааст, ки ӯ чанд аксе аз ҳузураш дар Истанбули Туркия нашр карда ва номашро дар бархе шабакаҳои маҷозӣ Абдулло гузоштааст.

Фаридуни Шамсиддини дар соли 2014, замони таҳсил дар синфи 7-уми як мактаби миёнаи Ҳисор бо гумони озори ҷинсии ноболиғи 6-сола боздошт ва шаш сол зиндонӣ шудааст. Соли 2020 аз зиндон раҳо ва пас аз ду сол оиладор шуд. Ҳоло як тифли даҳмоҳа дорад. То рафтан ба Русия дар шаҳри Ҳисор дар нонвойхонае кор мекардааст.

Хешовандони Фаридуни Шамсиддин дар деҳаи Лойоба мегӯянд, пас аз раҳо шудани аз зиндон дар рафтору кирдори ӯ амалкардҳои ғайриинтизореро мушоҳида накарда буданд.

ЛУТФУЛЛОИ НАЗРИМАД

Мақомоти тафтишотии Русия алайҳи ин шаҳрванди Тоҷикистон бар асоси моддаи "анҷоми амали террористӣ дар ҳайати гурӯҳи созмонёфта, ки боиси марги инсон шудааст" парванда боз кардаанд.

Баъзе аз расонаҳои Русия қаблан навишта буданд, ки ӯ як рӯз баъди ҳамла дар "Крокус Сити Ҳолл"-и Маскав барои дағалӣ бо полис боздошт ва дертар гуё рабт доштанаш ба ҳодиса собит шудааст. Азбаски он замон мурофиа паси дарҳои баста гузашта буд, мавқеи худаш маълум набуд. Дар зодгоҳаш ба дурустии он шубҳа доранд.

Хабарнигорони Радиои Озодӣ барои суҳбат бо наздикони Лутфуллои Назримад ба ноҳияи Панҷ рафтанд, аммо онҳоро наёфтанд. Ҳамсояҳои ин ҷавон гуфтанд, ӯ мактабро бо баҳои аъло хатм кардааст ва ба иттиҳоми эълоншуда нисбат ба ӯ дар Русия бовар надоранд. Вай тобистони соли гузашта Донишгоҳи шаҳри Бохтарро хатм карда, барои ҷустуҷӯйи кор ба Русия рафтааст.

Лутфуллои Назримад фарзанди калонии Назримад Ҳаётов, корманди идоари фарҳанги ноҳияи Панҷи вилояти Хатлон, будааст. Ба гуфтаи наздиконаш, падари хонадон ӯро барои кор ба Русия фиристода буд, то бо мадади писараш соҳиби манзил шаванд.

ҶУМЪАХОН ҚУРБОНОВ

Ҷумъахон Қурбонови 21-сола рӯзи 27-уми апрел бо қарори додгоҳи Басманнии шаҳри Маскав ва ба гумони “маблағгузорӣ барои омодагӣ ба ҳамлаи террористӣ” ба ҳабс гирифта шуд.

Манзили волидони Ҷумъахон Қурбонов дар ҷамоати Хуросони ноҳияи Фархори вилояти Хатлон ҷойгир аст. Модараш омӯзгор аст, падараш деҳқонӣ мекунад. "Бо саводи худаш ба Донишгоҳи омӯзгорӣ дар Душанбе дохил шуда буд. Зӯрамон нарасид, ки пули иҷора ва харҷҳои дигарашро диҳем. Ночор барои пулкоркунӣ ба Русия рафт," – нақл кард Бегиёр Саидов, падари Ҷумъахон, рӯзи 6-уми май ба Радиои Озодӣ.

Ӯ афзуд, Ҷумъахон ҳамроҳи бародараш, Сӯҳроб Қурбонов, дар як макон дар пойтахти Русия зиндагӣ ва дар сохтмон кор мекарданд. Ҳар моҳ барои харҷи оила то 20 ҳазор рубли русӣ ё зиёда аз дусад доллари амрикоӣ мефиристодааст. "Ман ба бегуноҳии фарзандам бовар дорам," -- гуфт Саидов ва афзуд, “ба иттиҳоми эълонкардаи мақомот дар Русия бовар надорем. Пайваста насиҳаташ мекардам, ки танҳо ба роҳи рост рав.”

ЁҚУБҶОН ЮСУФЗОДА

Кумитаи тафтишотии Русия Ёқубҷон Юсуфзодаро ба он муттаҳам кард, ки чанд рӯз пеш аз ҳамла барои таъмини гумонбарон бо ҷой "тавассути корти бонкӣ ба як шарикаш пул фиристодааст".

Муфаттишон гуфтаанд, як қисми пул "баъд аз содир шудани ҷиноят ба ҳисоби яке аз ҳамлаварон гузаронда шуд." Тасдиқи он аз манобеи дигар имконпазир нест. Назари худаш ё наздикону вакили мудофеъ ва ҷузъиёти парванда дастрас нест.

Саҳифаи "Маш" дар Телеграм нигоштааст, ки Ёқубҷон Юсуфзода ҳангоми амалиёти “Нелегал” ва тасодуфан рӯзи 26-уми март дастгир шуда, сипас робитааш бо ҳамлаварон ошкор гаштааст.

Ба иттилои дарёфтии Радиои Озодӣ, Ёқубҷон Юсуфзода 25 сол дорад, оиладор ва соҳиби се фарзанд. Ҳангоми боздошт дар сохтмон кор мекардааст.

МУҲАММАД ШАРИФЗОДА

Додгоҳи ноҳияи Басманнии шаҳри Маскав рӯзи 5-уми апрел дастури ҳабси Муҳаммад Шарифзодаро содир кард. Ӯ ба "амали террористӣ" муттаҳам аст, вале ба сабаби пӯшида будани мурофиа назари ӯ ё вакили мудофеаш дастрас нест.

Вазорати тандурустии Тоҷикистон тасдиқ кардааст, ки дар кишвар зукоми навъи Ҳонконг ва H1N1 ё зукоми хук доман паҳн мекунад.

Масъулини ин ниҳод ба хабаргузории "Азия Плюс" гуфтаанд, ин вирусҳо мавсимӣ ва барои Тоҷикистон нав нестанд.

Нишонаҳои ин ду навъи зуком ба ҳам монанд буда, аз таби баланд, дарди шадиди сар, камқувватӣ, сулфаи хушк ва дарди гулу иборат аст. Дар ин ниҳод гуфтанд, ҷойи ташвишу нигаронӣ вуҷуд надорад.

Аммо сокинон ва бархе аз табибон дар кишвар ҳафтаҳои ахир аз хуруҷи зукоме хабар медиҳанд, ки нишонаҳои он қаблан мушоҳида нашудааст.

Мутахассисон тавсия медиҳанд, ки дар ҳолати пайдо шудани ин беморӣ дар кӯдакон, бояд таваҷҷуҳи хос зоҳир шавад.

Таъкид шудааст, ки сокинон аз табобати худсарона худдорӣ карда, сари вақт ба пизишкон муроҷиат кунанд.

Додгоҳи низомии Покистон раиси пешини Созмони истихборотии ин кишварро (ISI) бо чанд иттиҳом, аз ҷумла, мудохила дар сиёсат, ба 14 сол зиндон маҳкум кард. Генерал Файз Ҳамид давраи маҳкумияташро дар зиндони низомаш сахт сипарӣ хоҳад кард.

Ин ҳукм дар кишваре, ки артиши он беш аз се даҳа ба таври мустақим ҳукуматро дар ихтиёр доштааст, аз нодиртарин маҳкумиятҳо алайҳи як генерали бонуфуз ба шумор меравад.

Артиши Покистон рӯзи 11 декабр эълон кард, ки Файз Ҳамид пас аз "раванди тӯлонӣ ва душвор", ба мудохила дар сиёсат, нақзи қонуни асрори расмӣ, сӯистифода аз манбаъҳои давлатӣ ва ворид кардани хисороти ғайриқонунӣ ба афрод, гунаҳкор шинохта шудааст.

Файз Ҳамид дар даврони нахуствазирии Имрон Хон, аз соли 2019 то 2021 раҳбарии ISI-ро бар ӯҳда дошт ва аз муттаҳидони наздики Имрон Хон ба шумор мерафт.

Покистон чандин ниҳоди истихборотӣ дорад, аммо ISI қудратмандтарин ва бонуфузтарини онҳо аст.

Имрон Хон, нахуствазири пешини ин кишвар пас аз он, ки ҳимояти фармондеҳони баландпояи артишро аз даст дод, дар соли 2022 аз қудрат барканор шуд ва акнун дар зиндон ба сар мебарад.

Артиши Покистон дар соли 2023 Файз Ҳамидро бинобар нодида гирифтани қонунҳои артиш, аз рутбаҳои низомӣ маҳрум карда буд.

Файз Ҳамид, ки замоне яке аз гузинаҳои аслӣ барои мақоми фармондеҳии артиши Покистон ба шумор мерафт, робитаҳои наздик низ бо Толибони Афғонистон дошт ва пас аз бозгашти онҳо ба қудрат дар соли 2021 гуфта буд, ки ин таҳаввул "ба хубӣ пеш хоҳад рафт".

Артиши Покистон дар ҳафт даҳаи истиқлоли ин кишвар беш аз 30 сол ба таври мустақим ҳукуматро дар даст дошт ва ҳамчунин нақши муҳиме дар ташкил ва суқути ҳукуматҳо иҷро мекунад.

Ҳунари миниётурнигории Камолиддини Беҳзод, мусаввири маъруфи форсизабон, аз номи Афғонистон ба Феҳрасти мероси ҷаҳонии ЮНЕСКО (Бунёди маориф, илм ва фарҳанги Созмони Милал) шомил карда шуд. Созмон гуфт, ин ҳунар барои ҳифзи бофти фарҳангӣ ва ҳувияти таърихии мардуми Афғонистон нақши меҳварӣ дорад.

Тасмим дар нишасти 20-уми ЮНЕСКО дар Ҳиндустон эълон шуд. Ҷаласа 11-уми декабр ба поён расид. Дар нишаст даҳҳо осори фарҳангии ҳафтоду ҳашт кишвар арзёбӣ шуда, бархе аз онҳо ба Феҳрасти мероси ҷаҳонӣ роҳ ёфтанд.

Муҳаммад Ҳумоюн Азизӣ, сафири Афғонистон дар Фаронса, гуфт, "Афғонистон ва ҳунари он зинда аст ва ҳеч торикӣ наметавонад рӯшноии фарҳанги Афғонистонро хомӯш кунад."

Раисҷумҳури собиқи Афғонистон Ҳомид Карзай низ ин тасмимро ситоиш карда, онро "манбаи ифтихор барои тамоми мардуми Афғонистон" номид.

Пешниҳоди Афғонистон барои сабти ҳунари миниётурнигории Камолиддини Беҳзод ҳанӯз соли 2021 ва зоҳиран пеш аз ба қудрат расидани "Толибон" сурат гирифтааст. Ин гурӯҳи тундрав дар бештар аз чор соли ҳокимияташ дар Афғонистон тасвири одамон ва мавҷудоти дигари зиндаро номумкин гардонд.

Камолиддини Беҳзод сарвати фарҳангии Тоҷикистон низ шумурда мешавад ва осорхонаи миллии ҷумҳурӣ ба номи ӯст.

Ин мусаввир ва миниётурнигори маъруф соли 1455 дар шаҳри Ҳирот зода шуда, дар давраи ҳукмронии Султон Ҳусайн Бойқаро ба шуҳрат расид. Дертар ӯро Шоҳ Таҳмосп аз сулолаи Сафавиён ба Табрез хонд ва дар он ҷо китобхонаи шоҳиро роҳбарӣ мекард. Дар ҳамон ҷо дафн карда шудааст.

Нигора Назарӣ, ҳомии ҳуқуқи паноҳандагони афғон дар Тоҷикистон, дар барбари як созмон ва се нафари дигар бо ҷоизаи бонуфузи Нансен қадрдонӣ шудааст.

Ҷоизаро UNHCR ё Комиссариати олии Созмони Милали Муттаҳид дар умури паноҳандагон рӯзи 16 -уми декабр дар Женева месупорад.

Назарӣ дар Тоҷикистон паноҳҷӯ аст ва ҳаммуассиси Маркази таълимии “Ориёно” дар шаҳри Ваҳдат мебошад. Ӯ риштаи иқтисодро хондааст, вале, ба навиштаи UNHCR, кумак ба паноҳандагонро интихоб намуд.

Вайро барои пеш бурдани кори муваффақиятомези марказе барои кӯдакони гурезаи афғон дар Тоҷикистон қадрдонӣ намуданд. Дар ин марказ ба кӯдакони паноҳҷӯ таълим медиҳанд.

UNHCR дар баёнияе Нигора Назарӣ ва барандагони дигари ҷоизаро “шахсони бузургу илҳомбахш” номид, ки ба афроде, ки маҷбур шудаанд фирор намоянд, “бо ҷасорату муҳаббати инсонӣ кумак расондаанд.”

Ҷоизаи асосиро Мартин Азиа Содеа аз деҳаи Гадо Бадрезери давлати Камерун ба даст овард. Ӯро барои ташкили кор ва пазироии 36 ҳазор паноҳҷӯ аз Африқои Марказӣ қадрдонӣ намуданд.

Пабло Морено Кадена барандаи ҷоизаи Нансен дар минатқаи Амрико дониста шуд, чун ӯ ба ҳайси як раҳбари корхонаи тиҷоратӣ дар Мексика барои ҳамгироии гурезаҳо дар бозори меҳнат заҳмат кашидааст.

Созмони украинии “Пролиска” дар бахши Аврупо барои кумакаш ба зиёда аз 3,2 миллион нафар ва Тобон Шореш дар бахши Шарқи Наздик ва Африқои Шимолӣ баранда шуданд. Шореш як фаъоли ҳуқуқи занон буда, барои наҷотёфтагони низоъҳо дар Ироқ, махсусан занону духтарон, кумак мерасонад.

Нигора Назарӣ барандаи ҷоизаи UNHCR дар бахши минтақаи Осиё ва Уқёнусияи ин созмон дар соли 2025 гардид.

Ҷоизаи Нансен соли 1954 таъсис ёфта ба шахсон, гурӯҳҳо ва созмонҳое тақдим мешавад, ки ҷудо аз кору фаъолияти касбии худ барои ҳимоят аз паноҳандагон, шахсони бешаҳрвандӣ ва ё беҷошудагон ёрӣ мерасонанд.

Мақомоти интизомии Душанбе аз боздошти аъзои як гурӯҳи созмонёфтаи ҷиноӣ хабар доданд.

Раёсати умури дохилӣ рӯзи 10-уми декабр бо нашри як гузориши телевизионӣ гуфт, ин гурӯҳи 5-нафарӣ дар ду соли охир дар Душанбе ва ноҳияҳои Ҳисору Ваҳдат ва Рӯдакӣ бештар аз даҳ бор дуздиву ғоратгарӣ карда, ду нафарро ҳам куштаанд.

Аз ҷумла, ба иттилои Раёсати умури дохилӣ, баъди ғоратгарӣ ва латукӯби Олимҷон Яқубови 72-сола ин пирамард аз ноҳияи Рӯдакӣ баъди муддате даргузаштааст.

Дар умум, ба гуфтаи мақомот, чаҳор узви гурӯҳ дастгир шуда, ду нафари онҳо дар хориҷ аз кишвар пинҳон шудаанд ва ҷустуҷӯяшон идома дорад.

Назари муттаҳамон ба ҷиноят маълум нест ва рӯшан нест, ки эътирофоти онҳо чигуна ба даст омадааст. Аммо онгуна, ки дар видео дида мешавад, сару рӯи яке аз муттаҳамон сиёҳу кабуд аст.

Раҳбарони Бритониё, Фаронса ва Олмон рӯзи 10 декабр бо Доналд Трамп, раисҷумҳури Амрико дар бораи охирин талошҳои Вашингтон барои таъмини сулҳ ва поён додан ба ҷанг дар Украина, телефонӣ сӯҳбат кардаанд.

Ин се кишвари аврупоӣ дар эъломияҳои алоҳида дар бораи ин тамоси телефонӣ гуфтаанд, ки раҳбарони онҳо аз талошҳои миёнҷигарии президенти ИМА дар заминаи даст ёфтан ба сулҳи пойдор дар Украина ситоиш кардаанд. Дар эъломияҳои ин се кишвар гуфта шудааст, ки баррасиҳо дар мавриди тарҳи сулҳ идома дорад ва дар рӯзҳои оянда низ идома хоҳад дошт.

Эммануэл Макрон, раисҷумҳури Фаронса гуфт, ки ҳудуди 40 дақиқа бо Доналд Трамп ва ҳамтоёни аврупоияш гуфтугӯи телефонӣ доштааст.

Дар эъломияи расмии ҳукумати Бритониё гуфта шудааст, ки раҳбарон тавофуқ доштанд, ки ин лаҳзаи сарнавиштсоз барои Украина, мардуми он ва амнияти муштараки Аврупо ва Атлантика аст.

Дар ҳафтаҳои ахир кишварҳои аврупоӣ ва Украина рӯи тарҳи пешниҳодии Амрико, ислоҳ ва такмили он кор карданд. Бар асоси ин тарҳ, Украина бояд ҷузъе аз қаламравҳои ишғолшудаашро бояд ба Русия вогузор кунад, аз пайвастан ба НАТО даст бикашад ва маҳдудиятҳоеро бар ҳаҷми артиши худ бипазирад.

Украина зери фишори Кохи Сафед қарор дорад, то ҳарчӣ зудтар бо Русия ба созиши сулҳ бирасад, аммо дар баробари тарҳи мавриди ҳимояти Амрико, ки дар моҳи гузашта пешниҳод шуд ва бисёре онро ба нафъи Маскав медонанд, муқовимат мекунад.

"Фарҳанги суманакпазӣ" ба Феҳристи мероси фарҳанги ғайримоддии ЮНЕСКО ворид шуд.

Вазорати корҳои хориҷии Тоҷикистон хабар дод, ки рӯзи 10-уми декабр, дар ҷаласаи 20-уми Кумитаи байниҳукуматии мероси фарҳанги ғайримоддии Созмони омӯзишӣ, илмӣ ва фарҳангии Созмони Милали Муттаҳид дар шаҳри Деҳлии Нави Ҳинд, "Фарҳанги суманакпазӣ" шомили ин феҳрист шуд.

Ба иттилои манбаъ, бахши "Фарҳанги суманакпазӣ" аз ҷониби Комиссияи миллии Тоҷикистон дар мавриди корҳои ЮНЕСКО таҳия гардида, соли 2023 ба баррасии ин созмон пешниҳод шуда буд.

Пештар аз ин, ёдгориҳои мероси фарҳангии "Хуттали Қадим", ба Феҳристи мероси ҷаҳонии Созмони омӯзишӣ, илмӣ ва фарҳангии Созмони Милали Муттаҳид ворид гардид.

Ёдгории табиии "Боғи миллии Тоҷикистон", шаҳри бостонии Саразм, инчунин мусиқии миллии "Шашмақом", ҷашни Наврӯзи байналмилалӣ, таоми миллии "Оши палов" ва "Чакан, санъати зардӯзӣ дар Тоҷикистон", аз ҷумлаи дигар мероси фарҳангии мардуми тоҷик ба шумор мераванд, ки аз сӯи ЮНЕСКО ба Феҳристи мероси ҷаҳонии башарият ворид гардидаанд.

Сафирони Иттиҳоди Аврупо розӣ шудаанд, ки чанд ширкат ва шахсони алоҳидаи дигар ба рӯйхати таҳримҳои зидди Русия дохил карда шаванд. Дар ин бора хабарнигори Радиои Аврупои Озод/Радиои Озодӣ рӯзи 10-уми декабр гузориш дод.

Дар санаде, ки Радиои Озодӣ дид, соҳибкори озарбойҷонӣ Талъат Сафаров ба рӯйхат ворид карда хоҳад шуд. Интизор меравад, ҳуҷҷат дар охири ҳафта пазируфта шавад.

Сафаров мудири кулли ширкати “2Rivers Group” дар Имороти Муттаҳидаи Араб аст ва ба иттилои Брюссел “дар интиқолу содироти нафти Русия, бавижа аз ширкати Роснефт фаъол аст”. Қаблан Бритониё алайҳи ӯ таҳрим ҷорӣ карда буд.

Соҳибкори покистонӣ, Муртазо Алӣ Лахонӣ, низ барои назорати “киштиҳое, ки маҳсулоти нафтиро аз Русия интиқол медиҳанд”, ба рӯйхати таҳримҳо ворид карда мешавад. Вай ҳамзамон ба идора кардани киштиҳо бе бимаи муносиб ва хомӯш кардани низоми пайгирии онҳо муттаҳам аст.

Қарор аст, чанд ширкати русӣ, як ширкати ветнамӣ ва ду ширкати воқеъ дар Имороти Муттаҳидаи Араб, ки гуё бо флоти соягии Русия пайванд доранд, таҳрим карда хоҳанд шуд.

Чанд нафаре, ки ба бовари Иттиҳоди Аврупо дар паҳн кардани иттилооти нодуруст дар ҷаҳон масъуланд, низ ба рӯйхат изофа мегарданд. Инҳо сиёсатшиносон ва коршиносони сиёсати байнулмилалӣ Дмитрий Суслов, Фёдор Лукянов ва Андрей Сушентсов ҳастанд, ки ҳамагӣ бо Клуби Валдайи тарафдори Кремл иртибот доранд.

Ин рӯйхат як гурӯҳ аз хориҷиёнро низ дар бар мегирад, ки ба қавли Брюссел акси садои Русия ҳастанд. Дар байни онҳо Ҷон Марк Дуган, афсари собиқи пулиси Флорида ва шаҳрванди Амрикову Русия; сарҳанги собиқи артиши Швейтсария Жак Бо ва афсари бознишастаи фаронсавӣ Ксаве Моро ҳастанд.

Кишварҳои ғарбӣ аз моҳи феврали соли 2022, замоне ки Русия ба хоки Украина таҷовуз кард, алайҳи Маскав ва шариконаш таҳримҳои сахт ҷорӣ кардаанд.

Дар Русия пешниҳодеро баррасӣ доранд, ки ба зангҳои телефонӣ аз хориҷа пайванд мегирад.

Мақомоти ин кишвар гуфтаанд, ҳадаф ҳимояти шаҳрвандон аз қаллобии телефонист. Агар ин пешниҳод қабул шавад, дар Русия метавонанд, бе ризояти муштарӣ тамосҳоро аз хориҷа манъ кунанд.

Дар ин бора раиси дастгоҳи ҳукумати Русия Дмитрий Григоренко хабар дод. Ӯ гуфтааст, пешниҳод аз 20 банд иборат аст.

Ин тарҳ ҳам манъи қабули зангҳои хориҷӣ ва ҳам ҷорӣ кардани симкортҳои кӯдаконаро пешбинӣ мекунад. Хабаргузории расмии "ТАСС" ба нақл аз Григоренко навишт, чунин ташаббус барои истеҳсоли камтари симкортҳо сабаб мешавад, чун қаллобон аз онҳо барои нақд кардани пулҳои дуздидашуда зиёд истифода мекунанд.

Чунин маҳдудият метавонад ба тамосҳо аз хориҷа ва телефони муҳоҷирони корӣ дар Русия низ таъсир расонад, чунки муоширати онҳо бо ватан ва берун аз он зери назорати бештар гирифта мешавад.

Ҳукумати Русия дар моҳи декабри соли 2024 бо мақсади мубориза бо қаллобӣ ба шумораҳои телефонҳои мобилу телефонҳои маъмулӣ аз интернет занг заданро манъ кард.

Дар моҳи августи соли 2025 дар Русия масдуд кардани зангҳои телефонӣ тавассути Telegram ва WhatsApp хеле маҳдуд шуд ва инро ҳам гуё ба мубориза бо қаллобӣ рабт доданд.

"Роскомнадзор" моҳи ноябр пурра масдуд кардани паёмрасони WhatsApp-ро шуруъ кард. Ин кор баъд аз он сар шуд, ки суҳбатҳои Юрий Ушаков, мушовири президенти Русия Владимир Путин дар мавриди сиёсати хориҷӣ ва Стив Виткофф, фиристодаи вижаи президенти Амрико Доналд Трамп аз ҷониби Bloomberg нашр шуд.

Аввали моҳи декабр дар Русия замимаҳои FaceTime ва SnapChat ҳам масдуд шуд. "Роскомнадзор" гуфт, чунин қарор ба он рабт дорад, ки ин паёмрасонҳо "барои ташкилу содир кардани амалҳои террористӣ ва ё қаллобиву ҷиноятҳои дигари алайҳи шаҳрвандони Русия истифода мешаванд”.

Ин нукта бештар ба ҷанги Украина рабт дорад, ки баҳонае барои маҳдуд кардани паёмрасонҳо ва шабакаҳои иҷтимоӣ дар Русия шудааст.

Владимир Зеленский, раисҷумҳури Украина, мегӯяд, агар Амрико ва муттаҳидони дигар барои интихобот заминаи амниятии боварбахш фароҳам оранд, ӯ ҳозир аст дар кишвари ҷангзадаи худ интихобот баргузор кунад.

Кохи Сафед аз ҳукумати Украина хоҳони баргузории интихобот шудааст ва президент Доналд Трамп рӯзи 9-уми декабр дар мусоҳиба бо нашрияи Politico бори дигар такрор кардааст, ки "вақти интихобот расидааст".

Ба гузориши маркази хабарии Радиои Аврупои Озод/Радиои Озодӣ, ҷанги Русия дар Украина давом дорад ва дархости баргузории интихобот дар ҳоле сурат мегирад, ки Қонуни асосии ин кишвар ба баргузории интихобот дар ҷараёни ҷанг иҷозат намедиҳад.

Зеленский гуфт, ӯ порлумонро ташвиқ хоҳад кард, то қонуне қабул кунад, ки дар ҳолатҳои фавқулода ба баргузории интихобот иҷозат бидиҳад.

Тибқи гузоришҳо, агар барои хатми ҷанги чаҳорсолаи Русия дар Украина дар ин наздикиҳо оташбас эълон шавад ва барои баргузории интихобот шароит фароҳам гардад, дар он сурат имкон дорад, ки интихобот дар зарфи 90 рӯз баргузор шавад.

Пулиси Душанбе аз аз боздошти ду нафар хабар дод, ки бо пӯшидани либоси низомӣ, худро кормандони Бозрасии давлатии автомобилӣ муаррифӣ карда, аз сокинон пул меситонидаанд.

Раёсати корҳои дохилӣ дар шаҳри Душанбе аз боздоштшудаҳо Шарифзода Абдуҷаббор ва Ҷӯрахонов Ҷумахон ном бурда, гуфтаанд, ки онҳо ба қаллобӣ гумонбар мешаванд.

Назари ин нафарон дар робита ба гуфтаҳои пулиси Душанбе маълум нест.

Мақомот мегӯянд, феълан нисбати онҳо парвандаи ҷиноӣ боз шуда, тафтишот идома дорад.

Моҳҳои ахир хабарҳо аз боздошти кормандони қалбакии пулис зиёд расонаӣ мегардад.

Ду ҳафта қабл Вазорати корҳои дохилии Тоҷикистон дар барномаи таҳлилии худ аз боздошти се нафар ҷавон гузориш дод, ки шабона ба роҳ баромада, худро корманди мақомоти ҳифзи ҳуқуқ муаррифӣ намуда, ронандагонро манъ ва дар сурати дарёфти камбудӣ даст ба тамаъҷӯӣ мезаданд.

Оҷонси омори Тоҷикистон мегӯяд, моҳи сентябри соли ҷорӣ дар кишвар ба 1 ҷойи кори холии пешниҳодшуда 6 корҷӯ рост омад. Ин дар ҳолест, ки дар ҳамин давраи соли гузашта ба як ҷойи кор қариб 5 нафар рост меомад.

Ба иттилои ин ниҳод, то охири моҳи сентябри соли 2025 дар кишвар беш аз 88 ҳазор корҷӯ ба қайд гирифта шуда буданд, ки 16,1 дарсад зиёд нисбат ба ҳамин давраи соли гузашта будааст.

Танҳо дар моҳи сентябр зиёда аз 11 ҳазор шаҳрванд барои мусоидат ба шуғл муроҷиат кардаанд, ин нишондиҳанда дар муқоиса бо соли гузашта 24,5 дарсад афзудааст. Қисми зиёди муроҷиаткунандагон занон будаанд.

Ба иттилои Оҷонсӣ, то охири моҳи сентябр корхонаву ташкилотҳо ҳамагӣ 14,6 ҳазор ҷойи кории холӣ пешниҳод кардаанд, ки 9,2% камтар нисбат ба соли гузашта аст.

Аҳолии Тоҷикистон солона то 200 ҳазор нафар меафзояд ва 70 дарсади аҳолии бештар аз 10 миллионнафарии кишвар ҷавонон ҳастанд. Ба сабаби бекорӣ ва ё музди кам, солона садҳо ҳазор нафар аз ҷавонони кишвар ба Русия барои кору зиндагӣ мераванд.

Раисҷумҳури Амрико дар мусоҳиба бо Politico гуфтааст, ки Украина бояд интихоботи президентӣ баргузор кунад.

Доналд Трамп гуфт, "онҳо муддати дароз интихоботе надоштанд" ва афзуд, "онҳо дар бораи демократия гап мезананд, аммо ба самте ҳаракат доранд, ки дигар демократия нахоҳад буд."

Президенти Амрико дар сурати баргузор шудани интихобот эҳтимоли пирӯзии Зеленскийро истисно накардааст.

Трамп қаблан низ ба интихобот дар Украина даъват карда, ҳатто президент Владимир Зеленскийро "диктатор" номида буд, вале баъдан ин изҳоротро такрор накард.

Муҳлати раёсати Зеленский соли гузашта ба охир расид, аммо тибқи қонун, ӯ то баргузории интихоботи нав дар мақомаш хоҳад монд.

Ба сабаби ҳуҷуми Русия, аз моҳи феврали соли 2022 дар Украина вазъияти низомӣ ҷорӣ шудааст.

Ширкати Paramount Skydance гуфтааст, ширкати Warner Bros. Discovery-ро ба 108 миллиард доллар харида метавонад.

Чанд рӯз пеш аз ин ширкати Netflix гуфт, барои бо нархи 82,7 миллиард доллар харидани Warner Bros. созишнома имзо кардааст.

Нашрияи The Guardian навишт, ширкати Netflix дар доираи ин созиш аз харидани саҳмияҳои Warner Bros., аз ҷумла шабакаҳои телевизионии CNN ва Discovery даст кашидааст.

Paramount гуфтааст, омода аст тамоми ширкатро бихарад. Масъулонаш дар номае ба саҳмдорони Warner Bros. гуфтаанд, қабули ин пешниҳод ба манфиати онҳо низ хоҳад буд.

Бовар меравад, ки созиш аз санҷиши идораҳои нозири давлатӣ хоҳад гузашт. Шӯрои мудирони Warner Bros. Discovery гуфт, пешниҳоди Paramount-ро меомӯзад.

Дар пешниҳоди Paramount яке аз сармоягузорон ширкати Affinity Partners ёд шудааст, ки муассиси он домоди президенти Амрико Доналд Трамп – Ҷаред Кушнер мебошад. Илова ба ин, падари раҳбари Paramount миллиардер Ларри Эллисон бо Кохи Сафед робитаи наздик дорад.

Трамп гуфтааст, ният дорад, дар қабули қарори созиш миёни Netflix ва Warner Bros. иштирок кунад, чун, ба гуфтаи ӯ, Netflix қисми калони бозорро дар даст дорад ва “ин чиз метавонад ба як мушкил табдил шавад”.

Иёлоти Муттаҳидаи Амрико гурӯҳе аз шаҳрвандони Русияро аз хокаш берун кардааст.

Ҳавопаймои онҳо шаби 8 ба 9-уми декабр тавассути Қоҳира ба Маскав расид.

Вебсайти "Агентство" аз қавли Дмитрий Валуев, мудири созмони Russian America for Democracy in Russia, навишт, мақомоти Русия дар фурудгоҳ ба мардони ихроҷшуда даъватнома додаанд, то худро дар комиссариати ҳарбӣ номнавис кунанд.

То ҳол маълум нест, ки касе боздошт шудааст ё не.

"Агенство" навиштааст, аз ин пеш дар моҳи июн ва августи имсол низ шаҳрвандони Русия аз Амрико берун карда шуданд.

Баъди ба қудрат расидани Доналд Трамп, суръати аз Амрико рондани муҳоҷирони ғайриқонунӣ ва паноҳҷӯёне, ки дархосташон рад шудааст, афзоиш ёфт.

Қаблан фаъолони сиёсӣ Владимир Кара-Мурза, Юлия Навалная ва Иля Яшин аз сарвазири Канада хоста буданд, ки кишвараш мухолифони ҳукумати Русияро бипазирад.